في البداية خلوني أقول لكم رأيي وإنطباعي عن الجهاز حتى الآن ، كثير يسألوني عنه وعن أستخدامه وكثير يبون يحولون بس مترددين من البرامج والاستخدام وهل الجهاز صعب ومدري ايش .. في نظري هالشيء يعتمد على إستخدامك للجهاز .. يعني مثلاً واحد مايستخدم اللاب توب الا عشان يتصفح الجرايد .. طبيعي ماراح يفقد ولا برامج في الويندوز لانه بس يستخدم المتصفح .. بالنسبه لي أنا استخدامي يعتبر استخدام جائر، ( يعني : جفاسه، كرف، تحميل، تصميم .. ) ما اطفي الجهاز أبد واستخدم فيه برامج كثيره وأخر جهاز كان معي حفرت كيبورده الين ما بقى الا شوي وأدخل على المذربورد .. وعشان أكون معكم صريح أكثر،  في اخر الأيام حسيت أصابعي صارت تلمس الويندوز  😀 

نجي لنوع الجهاز اللي شريته

ماك بوك برو 13 انش | MacBook Pro

 ماك بوك برو

تقدر تطلع على موصفات الجهاز وشكله من الموقع الرسمي : هنا


إستجابة الجهاز

الجهاز للأمانه سريع في تشغليه وتطفيته، ماتحس فيه ولا تجلس تنتظره، لذا أقيمه بأنه سريع التشغيل واستجابته عالية (ممكن يختلف الكلام مع اختلاف موصفات الجهاز)، هذي نقطة في صالحه لكن برضو سرعة الإستجابه ممكن تحصلها في أي جهاز جديد عالي الموصفات ، بس الشيء اللي لفت نظري وعلى طول حبيته وتعودت عليه هو ( الماوس باد ) .. استجابته لليد رهيبه .. وأهم شيء أنه يتحرك بـ التوتش زي الايباد والايفون يعني

واجهت الجهاز والإختلافات الموجودة فيه

كنظرة أولى للجهاز وواجهته بتحس أن أهلك حاطينك في السوق وناسينك .. بتحس كل شيء تغير عليك وأنك ضايع وحوسه .. لكن بعد دقايق بس بتكتشف أنه زي الويندوز أو أي نظام تشغيل غيره لكن مع أختلاف المسميات والأماكن، يعني على سبيل المثال : بدال مايكون شريط اللغة والساعة تحت صارت فوق،  بدال كلمة أبدأ حطو لك فايندر مثلاً، بدال برامج كتبوا لك تطبيقات

تثبيت البرامج

تثبيت البرامج ممكن يكون عن طريق تحميل البرنامج مباشرة من الموقع وبعدين تسوين له ( install ) واللي بشكل عام قريب جداً من طريقة الويندوز .. أو يكون عن طريق الـ App Store وهذي ميزة حلوه مهيب موجودة في الويندوز .. ممكن تفتح الاب ستور وتجلس تتمشى فيه وتشوف التطبيقات اللي تعجبك سواء من العاب أو برامج او تطبيقات اجتماعية  ( تويتر, فيس بوك ) وبالضبط مثل الاب ستور حق الايباد والايفون ونفس اليوزر اللي تستخدمه هناك تقدر تستخدمه هنا وتشتري وتحمل وتسوي اللي تبي ( اضغط هنا لشرح طريقة التسجيل في الاب ستور )

 

البرامج اللي كنت أستخدمها في الويندوز وبدائلها

هالنقطة كانت مخوفتني كثير خصوصاً إني أحب يكون الجهاز اللي أستخدمه فيه كل البرامج والإضافات اللي أنا احتاجها واستخدمها، عشان كذا يسموني أخويائي : عدو الفورمات .. لكن اكتشفت كثير برامج تكون تلعب على شارعين على قولتهم، تسوي البرنامج لكل أنظمة التشغيل لأن هدفها يكون ربحي أو الإنتشار والسمعه، لذا خلونا نأخذ لنا جولة بسيطة على بعضها

ادوبي | Adobe

adobe logo

كل برامج الادوبي موجود منها إصدار للويندوز والماك، الادوبي ريدر ( حق الـ PDF ) والادوبي فوتوشوب والإلستريتور والدريم ويفر والبريمير، هذي وغيرها كثير موجودة للنظامين ولكن بشكل غير مجاني، لذا الله يخلي التورنت

برامج التحميل

utorrent for mac

متوفر للماك برامج تدعم التحميل المباشر وبرامج ( تسريع التحميل ) على قولتهم ، والأهم برامج التورنت الموجودة في الويندوز موجودة في الماك وتقدر تحملها من الموقع الرسمي حقها، مثل الـ Utorrent

مشغلات الفيديو

vcl for mac

كثير من المشغلات الموجودة للويندوز موجودة للماك بعد، مثل VLC, RealPlayer وفيه مشغلات حلوة ثانية مثل Movist, MPlayerX

برامج تصميم وتحرير الصور والمواقع

dreamweaver

بالنسبة لتصميم الصور فمثل ماقلنا قبل شوي، تقدر تستخدم الفوتوشوب أو أبحث عن بدائل له ( أنصح بإستخدام هالموقع الرائع : Alternative To ) بخصوص برامج تحرير الصور وعمل الشروحات عليها ففيه برامج مثل SEASHORE, Skitch

اما بالنسبة للتعديل على المواقع فاللي يستخدم برامج تعتمد على الـ HTML مثل الأدوبي دريم ويفر أو المايكروسوفت فرونت بيج (FrontPage) يقدر يستخدم في الماك الدريمويفر (Dreamweaver) أو KompoZer أو NVU

وفيه غيرهم برامج لكنها تكون في الغالب خاليه من التعامل مع أكواد HTML ويكون التحرير فيها سهل ومهوب متطور وبقوالب جاهزه، مثل برنامج Freeway, RapidWeaver, flux, iWeb

برامج الحماية

avg for mac

برامج الحماية متوفرة للماك مافيها كلام ، فيه برامج مشهورة في الويندوز وتركب على الماك مثل الكاسبر سكاي Kaspersky, AVG .. وفيه غيرهم برامج كثير

المسن

المسنجر على الماك

مالي استخدام يذكر للمسن خصوصاً أن مواقع الشبكات الإجتماعية والجوالات الجديدة خلتنا شبه نستغني عنه  ..  موجود للماك المسن الرسمي من موقع هوتميل لكني جربته ومدري ليه ماحسيته حلو وما ارتحت له .. فيه برنامج ثاني اسمه aMSN ويقال أنه كويس لكن ما أقدر احكم عليه لأن استخدامي جداً قليل .. وأعتقد ماراح يكون بجودة المسن الموجود على الويندوز

ضغط الملفات

وين زيب للماك

طبعاً كلنا نحتاج برامج ضغط الملفات، لأن مثلاً لو عندنا مجلد في الجهاز مليان ملفات مهمه، ماتقدر ترسله بالبريد أو ترفعه على موقع رفع إلا لما تحطه في ملف مضغوط .. موجود للماكنتوش برنامج ضغط ملفات مجانية مثل الـ WinZip, StuffIt Expander

المتصفحات

المتصفحات في الماك

تقريباً جميع المتصفحات تركب على الماك ( فايرفوكس، قوقل كروم، اوبرا ) وطبعاً السفاري يجي متصفح إفتراضي في الجهاز .. حاولت أحمل متصفح الإكسبلورر 9 من موقعهم الرسمي لكن رفض لأني ما أستخدم ويندوز .. ممكن فيه طرق تحايل تخليني اركبه لكني للأمانه مادورت .. بالطقاق، اللي مايبيني ما أبيه <<– قفلت معه  😀 

ملفات الورد والبوربوينت

فيه مجموعة مخصصة للماك أسمها ( أي ورك  – iWork ) وهي مقدمة من شركة أبل طبعاً، تحوي هالمجموعة على ثلاث برامج ( بيجيز – Pages ) وهذا شبيه بالورد لكن متطور أكثر من وجهت نظري، تصميمه وطريقة التعامل معه جداً سهله يجي معها تيمبليت جاهزه بتصاميم مختلفه تقدر تختار منها اللي يناسبك وتبدأ تشتغل وتعدل عليه ( يختصر عليك وقت ويعطيك أفكار جميلة تناسب شغلك، سواء كتابة رسالة أو بطاقة أو نشرة بريدية ) والجميل في البرنامج أنه يدعم عربي ويفتح ملفات الورد ( .doc ) وممكن يحفظ الملف لو تبي بصيغة ملفات الورد اللي ذكرناها قبل شوي

مثال للتمبلت الجاهزه في البرنامج : اضغط هنا

البرنامج الثاني في المجموعة هو  ( كينوت – Keynote ) وهالبرنامج شبيه ببرنامج البوربوينت ويقوم تقريباً بنفس عمله لكن ميزته أكثر أحترافيه وفيه حركات كثيره مهيب موجودة في البوربوينت بالإضافة إلى تيمبليت جاهزه برضو .. ويدعم ملفات البوربوينت وممكن يحفظ شغلك لو تبي بصيغة المايكروسوفت بوربوينت ( .PPT )

مثال للتمبلت الجاهزه في البرنامج : اضغط هنا

واخيراً برنامج ( نمبرز – Numbers ) الشبيه بعمل برنامج المايكرسوفت إكسيل، مخصص للتقارير الحسابية ومشتقاتها، يدعم اللغة العربية ويدعم ملفات الإكسيل ويمكن حفظ الملفات بصيغة ( .XLS )

مثال للتمبلت الجاهزه في البرنامج : اضغط هنا

شاهد فيديو عن مجموعة أي ورك في الموقع الرسمي : اضغط هنا

الجميل في الأمر أن هذه المجموعة موجودة للأيباد ايضاً، بإمكانك شرائها عن طريق الأب ستور ومن ثم متابعة أعمالك وتعديلها وقت ماتشاء

اللي ذكرتها كلها برامج إضافية تحملها أنت بحسب رغبتك وإحتياجك، وفيه غيرهم كثير على حسب اللي تحتاجه، أما بالنسبه للبرامج الإفتراضية اللي تجي مع نظام الماك فاللي يبي يعرف عنها أكثر يقدر يطلع على هالموضوع ( أشهر برامج الماك )، أو هذا الموضوع للي يبي يتعرف على النظام أكثر وبعض خصائصه ( لمحة عامة على نظام الماك )، كل الموضوعين من كتابة CIS

بالنسبه لغالبية البرامج المذكوره هنا، موجودة بالإضافه لبرامج غيرها في مكتبة البرامج، تقدرون تحملون اللي تبونه من هنا

مكتبة البرامج )

بالنسبه لعيوب الجهاز من وجهة نظري، سعره مبالغ فيه !! .. شكله الخارجي حلو لكني أحسه يتمخش بسرعه .. تحتاج تحط عليه كفر أو تصير محافظ أو ما تدقق في اللي يجيه .. وعشانه يعتبر المنيوم احسه إذا أحتر شوي يصير يولع حراره ويكوي

24 تعليقات

  1. الله يعطيك العافيه عالموضوع الرائع tch28
    بس سؤال: لو كنت حابه اعمل ابقريد لـ Lion، أقدر؟

    • الله يعافيك، على حسب ماصرحت أبل أيه تقدرين .. بيكون النظام موجود في الاب ستور وسعره 29 دولار .. تشترينه من الاستور وتحملينه على جهازك وبعدين تسوين ليه أبقريد أو أنستول .. ما ادري بالضبط كيف لكن بيكون كذا tch17

  2. الف الف مبروك عليك الجهاز tch34

    الله يهنيك فيه ، انا معي ماك بوك وايت لكن للاسف ما عطيته وجه للان تحميل برامج وكذا ، بس كنظام كثير ارتحت له الحمد لله ،،
    اكثر شي افادني برامج تشغيل الفيديو تسلم يا باشا tch26 ..
    وش حنا بدونك ياخي tch38 ،
    مشكرين اوي وتشكّر لي من صاحبك الي اقنعك tch35

    • الله يبارك فيك tch40
      معك وايت tch41؟ .. يالزلااااابه <<-- قام يهايط tch38 الوايت حلو مره لكني ما فكرت فيه لأن جهازي القديم كان سوني فايو الابيض .. واللي تقريباً منسوخ من الماك وايت tch3 .. لذا حبيت أغير tch17 بالنسبه للبرامج .. مشغلات الفيديو اللي ذكرتها تشغل صيغ كثيره ومهمة، مثل AVI لو كنتي متابعه للأفلام .. وبرضو تعرض لك الترجمة، وأشوفها ممتازة للإستخدام وخفيفة tch20 إذا لك خلق، تصفحي هالموقع http://www.macupdate.com خاص بالبرامج وميزته فيه فوق فلتر .. تحددين منه اللي تبين ( برامج مجانية، مدفوعة، تطبيقات، عمل، تعليم ... الخ ) وبالتوفيق tch17

  3. مبروك على الجهاز , أنا بصراحه ودي أشتري Mab book air 13 انش .. بس شايل هم واحد بس , يعني بيني وبينك 😀 tch13 انا ماني مستخدم ولا برنامج أصلي عندي بالجهاز , من نظام التشغيل نفسه الويندوز إلى أوفيس إلى كل شيء بفلوس فهو عندي بطريقة مجانية ( مكرك يعني ) tch3 انا اللي معيقني عن شراء الماك هو إني لازم أشتري البرامج , وانا ماظنيت أشتري أي برنامج .. مدري ليه ؟!
    في الماك .. تقريبا البرامج الأساسية كم تكلفك , مثل انترنت داونلود منجر , الأوفيس , هذي كم تكلف ؟ وهل يمديك تكرك برنامج على الماك ؟

    • أهلين أخوي، البرامج فيه منها كثير مجاني وفيه برامج مدفوعة (بفلوس).. لكن حتى البرامج اللي بفلوس تحصلها مكركه في التورنت وفي مواقع التحميل ( الربيد شير والميديا فاير .. ) فـ من هالناحية لا تشيل هم .. اللي سوو كراك لبرامج الويندوز سوو كراك لبرامج الماك tch36

    • السلام عليكم

      حبيت اوضح لك عن نقطه لو بتشتري ماك بوك اير حط ببالك انه مافيه فتحه السي دي ، ابل تحاول انها تقضي على الاوبتكال درايف (سي دي )
      ويعوضونك ببدالها شريحه اسمها reinstall drive
      موفق

  4. يووووه ذكرتني بازمتي يوم حملت الـ Mac على جهازي وخرب tch10
    ولا عاد اشتغل بس الحمدلله رجعته بدون فرومات tch5 بس إلى الله الآثار ما راحت

    معلومة اضافية فيه نظام تشغيل ثاني وهو Linux
    بالنسبة لي حلووو استخدمته الثلاث شهور اللي فاتت
    وهو ينفع للمبرمجين أكثر لانه مفتوح المصدر
    واللي حلو فيه انه مجاني وبرامجه مجانيه tch17

  5. ناقصك صروال وفنيله <<< ستيف جوبز 😀

    ان حبيت الجهاز فهو منك

    طبعا الويندوز في نظري مثل الددسن يخرب ويزين برخص الاثمان وكل قطع التلفيق تمشي معاه وكل مفتاح يشغله هههههههههه

    الماك جميل خاصه في السرعه والاستجابه و المنتاج لكن مافيه الا عيب واحد وهو الاحتكار على برامج محدده ولو كان فيه برامج محدده ماتكون متنوعه مثل الويندوز

    لكن اللي يبي يريح راسه ومايبي مشاكل تعليق وفيروسات تدوخه ياخذ الماك وهو مغمض tch40

    نشكرك على مكتبة البرامج المهمه اللي تفيد كل مستخدم و تعتبر مرجع مهم للمهتمين tch40

    بارك الله فيك يا مستر ستيف tch24

  6. كلام جميل وملم، وخلاص قررنا نشتري.
    بس بسألك، فيه فرق من إنك تشتري من إكسترا أو أي محل ثاني؟
    يعني إكسترا تقدم لك شي ممكن ما تحصله بالمحلات الثانية؟ ولا ما يفرق؟

    شكراً لك :d

    • اهلين، مبروك مقدماً tch3
      بالنسبة للشراء .. على حسب، يعتمد عليك يعني .. مثلاً إذا تعرفين لك أحد في امريكا بيطلع لك ارخص من هناك .. اذا بتشترين من السعودية فيه اكسترا عنده نوعين ، واحد بـ ٣٦٠٠ الظاهر والثاني ٤٩٠٠ وكلهم نفس المقاس ١٣” لكن الفرق بينهم هو المعالج .. اللي ٤٩٠٠ تحصلينه في حاسبات العرب والا في المحلات اللي يسوون له عروض بـ ٣٧٠٠ تقريباً

      بالتوفيق tch17

  7. عشت يالطربه
    انا اشهد انك كفيت ووفيت ‘
    ولكن عندي سوال ؟
    هل يمكن اني اركب نظام الماك على Dell
    ادري سوال غبي بس بصراحه انا من عشاك الماك
    والي قاهرني ان سعره غالي وما اقدر اجيبه
    وهل تتوقع بينفع ويصير أكه ؟ :>

    • السلام عليكم ،
      الآن يمكنك تركيب الماكنتوش على أجهزة الـ PC ( الأجهزة التي تعمل على نظان Windows ) وبهذه الطريقة تسمى الهاكنتوش .
      يمكنك مراجعة موقع برامج نت يوجد فيه شروحات رائعة .

  8. شكرا لك على الشرح ،،
    ولكن فيه سلبيات في الماك ما ذكرتها مثل اختلاف لوحة المفاتيح عن الاجهزة العادية في توزيع الحروف، واللي دارس الطباعة باللمس وطريقة (كمنت شسيب) والكتابة السريعة راح يتوهق مع الماك لان الكيبورد مختلف تماما وهناك طريقة لاعادة توزيع الحروف لتصبح مثل الويندوز ولكن متعبه ..
    وأيضا بالنسبة للحماية في الماك في الافضل مقارنة بالاجهزة العادية ونسبة الحماية 100% مثل ما يقولون ..
    وشكرا لك .. tch35

    • العفو اخوي، فعلاً لوحة المفاتيح تختلف لكن مو بشكل كبير ، فيه اختلاف بسيط واللي حافظ الكيبورد حق الويندوز ما راح ياخذ وقت عشان يتعود على حق الماك ، بالكثير شهرين tch3 .. وخاصية تحويل الكيبورد لنظام حروف الويندوز سهله ويسألك الجهاز اول ما تشغله لأول مره هل تبي كيبورد ماك والا ويندوز ؟ لكن المشكلة في هالطريقة لو كان كيبوردك محفور على نظام الماك هنا ما انصح تغيير لان خلال فترة بسيط بتتعود وخلاص tch36

      حياك ربي tch26 tch34

  9. الله يعطيك العافية على الشرح
    أنا ايضا انتقلت من عالم وندوز للابل و بصراحة ما ندمت tch40 فعلا الابل له طعمه الخاص في النت ،، راقي و متطور ومافي تعليق كثير زي الوندوز
    طبعا مازلت افقد بعض البرامج التي كنت استخدمها في الوندوز ولكن مع الوقت وجدت البديل و عالعموم اغلب برامج الشركات تدخل ابل في حسابها و ليس احتكار على الوندوز كما في الماضي
    استغربت فقط على بحثك على تصفح الوندوز لانه اغبى متصفح عرفته وتبقى الوفاء للاصدارات الأولى و حينما كنت استخدم الوندوز بدأت استخدم متصفحات وكذلك في الماك فسفاري لا يعجبني و للأمانة في نظري متصفح وندوز افضل منه ،،

  10. السلام عليكم انا حملت ملف للويندوز من النت tch17 بس لمن اشغله على البيجز يطلعلي كلام مفكفك زي كذا /Users/macbookpro/Desktop/Screen Shot 2013-01-08 at 3.10.38 AM.png هل في حل للمشكلة هذي ……. الرجاء الرد الاسرع من السريع احتاج الرد في اقل من ٣ ساعات عندي اختبار ولازم اراجع النمووذج tch10 🙁 tch9

    • وعليكم السلام ورحمة الله وبركاته،
      أهلين .. جرب تسوي تحديد كامل للنص وتغير الخط إلى خط ثاني .. إن شاء الله يضبط معك

Leave a Reply to خوووخيتا الغاء التعليق

اكتب تعليقك
اكتب اسمك هنا