Apple TV | أبل تي في

كتب بواسطة يونيو - 19 - 2011   |  ضمن قسم آبل, ابل تي في, ماك

 

ببساطة (الأبل تي في) عبارة عن جهاز يعرض مالديك من صوتيات وفيديو وصور على جهاز التلفاز بدون أي أسلاك ( واير لس )

 

أبل تي في | Apple TV

الجيل الثاني – 2G

 apple tv - ابل تي في

السطر اللي قبل شوي في البداية كان التعريف بشكل مبسط، أما بالنسبة للشرح بشكل مفصل فـ الله يعينك أنزل تحت

 

في البداية خلونا نعرف وش حجم القطعة هذي وكيف آليتها ومنهي بنته بالضبط ، أولاً يعتبر هذا هو الجيل الثاني من الأبل تي في .. حيث أن أبل قد أصدرت في السابق جهاز ( ابل تي في ) قبل هذا ويسمى حالياً بـ ( الجيل الأول )، حجم الجيل الأول أكبر مرتين أو ثلاث مرات من الجيل الثاني، لون الجيل الأول أبيض بينما الجيل الثاني يحمل اللون الأسود ( عشان ينحط على الدولاب وما ينشاف، لا أحد يقول : يااااي الأبيض شكله كيوت، أبغى أبيض <<– مهوب الهدف التكشخ فيه ترى )، الجيل القديم كان فيه هارديسك بحيث تحمل عليه أفلام بينما الجديد لا يحمل هارديسك

 

حجم ابل تي في - apple tv size

مثل مانشوف في الصورة، حجم الجهاز قد كف اليد .. طريقته سهله جداً، تشبك كيبل الـ HDMI وتشبك سلك الكهرب طبعاً .. وبكذا تكون خلصت

apple tv hdmi caple - كيبل الاتش دي ام اي في الابل تي في

 

طيب شبكته وبعدين ؟ .. تطلع ريموت التحكم من الكرتون

ريموت الابل تي في - apple tv reomte

بعدين تروح ترجع الكرتون مكانه <<– واحد يبي يطول الشرح بأي طريقة .. تشغل التلفزيون وتحط على قناة الأتش دي أم أي وبتطلع لك قائمة الأبل تي في .. واللي بتكون زي كذا

كيفية استخدام الابل تي في

شرح طريقة استخدام الابل تي في

طيب شبكتها وشغلتها وبعدين وش أسوي فيها ؟ 

ياربيه يا كثر اسألتك .. تقدر تستأجر مسلسلات أو أفلام وسعرها رمزي 4$ تقريباً للفلم الـ HD ويمكن 2$ للفلم ذو الجودة العادية، غير كذا تقدر تتصفح اليوتيوب / نيتفليكس / فلكر / العديد من البودكاستات والإذاعات .. والأهم من وجهت نظري هي خاصية ( الأير بلي – AirPlay ) وش ميزة هالخاصية ؟ تقدر تعرض أي مقطع فيديو أو صوت أو صور من خلال جوالك الايفون أو الايبود تتش أو الايباد أو حتى اللاب توب عن طريق الواير لس

 

عرض الافلام والفيديو واير لس في الابل تي في

لما تجلس في نفس الغرفة اللي موجود فيها الأبل تي في ( لازم يكون فيه شبكة واير لس ) تشبك جوالك أو ايبادك على الشبكة وبكل بساطة تشغل اليوتيوب مثلاً وتشغل اي مقطع طبيعي .. بتحصل تحت موجودة هالأيقونة

air play icon on apple tv

youtube on apple tv air play

 

لما تضغط عليها زي ما هو موجود في الصورة على طول مقطع اليوتيوب أو الفلم اللي أنت محمله على الايباد او الايفون أو الايبود توتتش راح ينعرض على التلفزيون .. حتى الصور الموجودة في هذي الأجهزة ممكن عرضها عن طريق خاصية الـ Air Play .. أما بالنسبة للاب توب، كل اللي عليك هو أنك تفتح الأيتونز iTunes وبعدين تضغط على كلمة Advance اللي فوق .. وبعدين تدور على الخيار Turn on Home Sharing .. لما تختارها بيطلب منك تدخل حساب الابل الخاص فيك، وبعدين بتطلع لك ايقونة الـ Air Play تحت

 

طريقة عرض الافلام على الابل تي في من خلال اللاب توب

تشغيل الهوم شيرينق اللاب توب مع الابل تي في

أي فلم يشتغل عندك على الأيتونز معناها يشتغل على الأبل تي في، واظن الصيغ اللي تتوافق مع الايتونز هي ( m4v, mp4, mov ) بالنسبة للأفلام اللي تكون محمله عن طريق التورنت واللي غالباً ما تكون avi هذي ماتشتغل مباشرة عليه .. تحتاج تحولها لصيغه يقبلها الأيتونز، أو كما سمعت (منيب متأكد) تسوي جيلبريك للابل تي في وتكون تقدر تشغل عليه صيغ أكثر من اللي قلناها قبل شوي

 

بما أن ريموت الـ Apple TV التعامل معه شوي مهوب مريح، وبما أنه صغير مره ومُهيء أنه من أول يوم يضيع ، فيه برنامج يخليك تتحكم بالأبل تي في وبالايتونز عن طريق الايفون والايباد والايبود توتتش 

 

Remote

تطبيق ريموت للتحكم بالابل تي في والايتونز

تحمل التطبيق من الأب ستور الخاص بجهازك ( ايباد – ايفون .. ) وبعدين تشغله وبتحصل هالشاشة

ريموت : تطبيق التحكم بالابل تي في والايتونز

تختار اللي يناسبك من هالخيارين وبعدين بيطلب منك حساب ابل الخاص فيك .. تسوي تسجيل دخول وخلاص

نقدر نشوف هنا مثال لي انا لما سويت اقتران مع الايتونز حق جهازي ومع الابل تي في

التحكم بالابل تي في من خلال تطبيق ريموت

الخيارين كلهم قدامك .. وش تبي تتحكم فيه ؟ تبي الأيتونز ؟ بكل سهولة تقدر تدخل على الأيتونز حق جهازك وتشغل أي فلم أو مقطع صوتي من جهاز الايباد أو الايفون، مثل مانشوف في الصورة

التحكم بالايتونز عن طريق تطبيق ريموت

 

تبي تتحكم بالأبل تي في ؟ تختارها من الصفحه الرئيسية لتطبيق ريموت وبعدين بتكون قادر أنك تتحكم فيها بدال ما تتحكم بالريموت العادي، وهالطريقة فيها ميزة أنها أسرع تحكم من الريموت وبرضو الكتابة بتكون أسهل ويدعم كل اللغة ( حتى الكتابة والبحث بالعربي )، وزي ماتشوفون في الصورة تحرك اصبعك على شاشة الايفون وتتحكم بالابل تي في

 

التحكم بالابل تي في عن طريق تطبيق ريموت

 

 

 

وأخيراً، نختم الموضوع بميزة جديدة راح تطبق في الـ iOS 5 الخاص بالأيباد، وهي نقل شاشة الأيباد بالكامل على شاشة التلفزيون بدون كيبل ولا حاجه

 

 

باقي بس نقطة صغيره وهي سعر الجهاز، سعر القطعة في موقع أبل الرسمي 99$ يعني تقريباً 380 ريال .. وأذكر شفتها في الرياض في كذا محل بـ 600 ريال وحولها .. عاد أنت وضميرك .. تبي تشتريها من هنا وتدعم السرقة والزرف الوطني ، وإلا تبي تشتريها من هناك، اللي يريحك أهم شيء اننا علمناك السعر

*  *  *  *

عيوب الجهاز بالنسبه لي، كعادة أبل ما تدعم كل الصيغ لازم جيلبريك وحوسه ! نقطة إستأجار الأفلام والمسلسلات ماتفيدنا يالسعوديين كثير لأن النت مايساعد الإستأجار وبنفس الوقت التورنت عندنا غير محظور ولا عليه عقوبات زي أمريكا، ماتقدر تعرض في جهاز اللاب توب إلا الأشياء الموجودة في الأيتونز، يعني ما تقدر تعرض سطح المكتب وملفاتك وكذا زي الكيبل

44496 زيارة  | 

الكلمات الدليلة : , ,

 

لمحة عن Mr. A

مهذب وخلوق واقطر ملح .. طبعاً ما يحتاج أقول لكم أن هذي مهيب صفاتي .. لا بس هذي هي الصفات اللي أحلم فيها : )
  • RSS

مواضيع عشوائية :

26 تعليق حتى الأن.

  1. ammar قال:

    اضافه خطيره ومميزه كا عادة ابل سباقه في كل ماهو مميز
    يلزمنا جهاز اوصيك على واحد ولا زعلت عليك <<<<< توهق به 😀

    الله يعطيك العافيه ياعزيز tch27

  2. hesham قال:

    الله يعطيك ١٠٠٠ عافية وماقصرت على الشرح الرائع .

    و احب ازيد ان Apple ناوية تطور Apple TV اكثر وتدخل عن طريقة عالم الالعاب وياويلكم يا سوني tch40 .

  3. جالكسي تاب قال:

    ولله شركة أبل قوية جدا ..,,

    لكن انا ملاحظ ان هالموقع ذا ( تكنو )
    ساحب على ام ام شركه سامسونج ( جالكسي s , جالكسي s2 . جالكسي تاب , جالكسي تاب اكبر من الأول هع هع )
    ياليت تحطون قسم للحلوين tch27

    • Mr. A قال:

      مرحباً، في البداية أشكرك على مدحك للموقع وكتابتك إسمه بين قوسين tch27 <<-- فاهم غلط tch38 بالنسبة للجالكسي ( أو غيره من الأجهزة ) فـ عدم الكتابة عنه لا تعني عدم كفاءته أو أنه منتج زلابه tch3 .. الموقع بشكل عام يختص بالتغطيات والشروحات للاشياء المستخدمة ومجربة، وللأن ما حصلنا واحد عنده أحد الأجهزة اللي ذكرتها عشان يغطيها ، الا إذا قصدك اني اشتري جهاز عشان اكتب عنه عاد tch38 حياك ربي tch20

  4. faris قال:

    عندي سؤال هل استطيع استخدام التطبيق للتحكم بالأيتونز فقط دون وجود جهاز الابل تي في؟

  5. kashoo5h قال:

    طيب الحين شسمه اجل وش فايده الابل تي في ذا .. دام انه لو اشتري كيبل بس اشبكه من ال لاب لل تي في بيطلع لي كل شي!!؟

    يعني مشكله انه مايعرض اي صيغه وزياده مايعرض الا الي ع الايتونز! شالفايده اجل ؟؟

    ولا حتى الكيبل كذآ!!؟

    • Mr. A قال:

      مرحبا، الكيبل فعلاً بيطلع لك كل شيء على عكس الابل تي في .. لكن الفرق ان هذيك تكون واير لس، وتعرض من الايباد والايبود والايفون، اما لو تستخدمها فقط عشان اللاب توب تشتري الوصلة افضل لك وارخص حتى tch36

      وهي فيها اضافات اخرى مثل انها تشغل اليوتيوب مباشرة بدون جهاز وممكن تستآجر فلم او مسلسل ( ممكن هالخدمة مفيدة اكثر للغرب ). ففي النهاية تعتمد على استخدامك انت، تبيها عشان اللاب والا كيف؟

  6. kashoo5h قال:

    اييي انا ابيها للاب عشان الافلام والعرض وكذا ..

    ولكن بصراحه تحطمت يوم دريت ماتصير الاا للتلفزيونات الجدد الي يصير فيه منفذ hg HD وتقريبآ كل الي عندنا مافيهم منفذ 🙁

  7. kashoo5h قال:

    اوكي .. مشششكور ع وقتك واجابتك 🙂

  8. kashoo5h قال:

    شسمه .. رجعت لك مع ازعاجي tch27

    الحين سلك ال hdmi يشبك ع البروجيكتر؟ او ال ابل تي في ؟ ولا ولاواحد منهم ؟

    • Mr. A قال:

      اهلين،
      لا عادي حياك tch34
      بالنسبة للابل تي في تحتاج كيبل HDMI ضروري، ويكون مشبوك فيها وفي التلفزيون .. مدري عن البروجيكتر وش الوصلة اللي تنشبك فيه .. ممكن يعتمد على نفس موصفات البروجيكتر هل يكون فيه مخرج HDMI والا لا؟ لكن اللي اعرفه ان البروجيكتر له مخرج ثاني غير الـ HDMI tch33

  9. kashoo5h قال:

    مممممممم اوكي مي تو اتوقع انه مخرج ثاني!

    الابل مشكلتهم مشكله!

    ابشوف ان شآء الله

    مشكور مره ثانيه

  10. memy قال:

    tch26
    مساء الخير اخوي دوبني شريت واحد
    علشان اربطه مع الايباد والبرجوكتر .. علشان اشرح لطالباتي من خلاله

    كل اللي عرفت اسويه اني افك كرتونته ..
    شرحك طيب بس ابي بعد تفصلي تفصيل اكثر
    وهل لازم جل بريك له tch10

    • Mr. A قال:

      أهلين .. مساء النور tch34 tch26
      بالنسبة للجيلبريك فهو ما يحتاج إن شاء الله .. بكل بساطة تحتاجين تشغلين الجهاز ويكون موصول بالكهرباء وموصول بالتلفزيون أو البروجيكتر ( لازم بروجيكتر فيه وصلة اتش دي ام اي ) وبعد تشغليها بيطلب منك تسوين اقتران مع شبكة الواير لس الموجودة. وخلاص كذا تقريباً انتهيتي .. بمجرد ما يكون الجهاز شغال والايباد والابل تي في كلهم موصولين بنفس الشبكة ( مودم واحد ) خلاص تقدرين تسوين نقل لشاشة جهازك مباشرة.

      هذا الموضوع بيفيدك إن شاء الله من ناحية عرض شاشة الايباد والايفون على الابل تي في:
      http://www.tichno.com/apple/iphone/airplay-mirroring-on-ipad2-and-iphone-4

  11. عبود قال:

    ياطيب أنا عندي إيباد3 وأبغى اشغل فلم أون لاين من الايباد الى التلفاز اشتري كيبل ولا ابل تي في وش الحسن فيهم المهم عندي أن الموجود في شاشة الايباد تكون نفسها على إلتلفزيون 😀 😀

  12. راشد قال:

    مرحبا اخوي
    انا شريت جهاز ابل تي في الجيل الثالث الاسود واشتغل معي لمدة يومين وبعدها طلعتلي علامة ايتونز والوصله عالتلفزيون وما مو راضي يشبك معي بالوايرلس والبلاتوث
    فما الحل ارجو افادتي ؟

    • Mr. A قال:

      مرحباً،
      غالباً تحتاج توصلها بالكمبيوتر وتسوي لها ريستور عن طريق الايتونز. ممكن تشوف في اليوتيوب عن كيفية عمل الريستور للابل تي في.

  13. مواطن عربي قال:

    السلام عليكم

    اخي الكريم هلا تفضلت وتكرمت بالمساعدة بحل مشكل عدم توافق برنامج التحكم Remote مع الاصدار الجديد من ابل تي في؟

    او اذا كان هناك اي برنامج اخر، فكما لا يخفى عليك مشكل البحث داخل ابل تي في باللغة العربية، الان نعاني من هذا المشكل مع الاسف الشديد.

    وتقبل خالص الشكر والامتنان مسبقا على حسن تعاونك

  14. سارة قال:

    لو سمحت انا عندي هالجهاز وماشي تمام بس يوم اشغل مسلسل من الويب يجلس شوي شغال وبعدها افقد الاتصال بين الابل تي في وجوالي وفي كل مرره اسوي اقتران وش الحل مليت كل شوي اضبطه عشان ارجع اشوف المسلسل 😢💔💔

  15. سها قال:

    السلام عليكم
    ادري الموضوع قديم بس احتاج مساعدتكم شلون انزل برنامج Starz play ((حق الأفلام يلي يشبه نت فلكس))
    شلون احمله على تي في أبل و تظهر أيقونته مثل باقي البرامج
    ؟؟؟
    أنا ما عندي لأب توب ولا كمبيوتر لو في طريقه تساعدني عن طريق الايباك او الآي لون
    و الف شكر

    • Mr. A قال:

      وعليكم السلام ورحمة الله وبركاته
      الابل تي في حقك الموديل الجديد اللي فيه متجر برامج او القديم؟
      اذا القديم مافيه حل. اذا الجديد تحمله من متجر الابستور اذا هو موجود.
      مايحتاج كمبيوتر.


صفحة جديدة 2